24/06/19

Fin de curso, bo verán!!!

Á espera das vacacións de verán, xa as temos aquí:
Para festexalo, o venres no cole realizamos unhas cantas actividades. Comezamos coa obra de teatro representada marabillosamete polos compañeiros e compañeiras de 2º de Primaria "Por que chora este neno?".
Podedes vela no seguinte vídeo:


Despois da comedela de fin de curso nas aulas, organizamos unha xuntanza para ver fotos e celebrar a graduación do alumnado de 6º de Infantil e 6º de Primaria xunto coas súas familias. 
Comezaron os nenos de Infantil recollendo as súas orlas.
A continuación, recibíronas os rapaces e rapazas de 6º de Primaria. 
Finalizamos a xornada visualizando un vídeo resumo das actividades levadas a cabo nas aulas para desenvolver o noso PDI "Meu amigo o robot 2".
Rematado o curso 2018/19, só nos queda desexarvos un bo verán a todos e todas. Descansade moito, vémonos en setembro.
Aos compañeiros e compañeiras de 6º de Primaria que cambian de etapa, moitísima sorte no instituto e nos vos esquezades de visitarnos de vez en cando.

PDI "Meu amigo o robot 2"

Ao longo do curso 2108/19, traballamos no CEIP A Carballeira o PDI "Meu amigo o robot 2", novamente, co obxectivo de desenvolver as competencias STEM. O noso proxecto incluiu Programación con Mblock, robótica e gamificación nas aulas.
Queremos compartir convosco o vídeo resumo de todas as actividades realizadas no colexio para levar a cabo o noso PDI "Meu amigo o robot 2":
O vindeiro curso, volveremos con novos desafíos STEM!!!

22/06/19

Xornal Escolar 2018/19

Xa tedes a vosas disposición o Xornal Escolar 2018/19 coa recompilación das actividades realizadas para o desenvolvemento do Proxecto de fomento de uso do galego durante o curso 2018/19 no CEIP "A Carballeira" de Lourizán:

Memoria Gráfica Biblioteca, Dinamización da Lingua Galega e TIC - curso 2018/19

Velaquí vos deixamos a recompilación de todas as actividades organizadas dende o  Equipo de Biblioteca, Tic e Dinamización da Lingua Galega ao longo deste curso 2018/19 para desenvolver os diferentes Plans e Proxectos do centro:

Grazas a todos e todas pola vosa colaboración!!!

Contacontos na biblio!!!

Esta semana, Nerea, Carmen e Gabi, de 6º de Primaria, volveron ser os nosos contacontos con "Mi espacio propio", a derradeira historia para despedirse dos Pequerrech@s.

18/06/19

Grazas colaboradores!!!

A piques de rematar o curso 2018/19, dende a Biblioteca do Checho queremos agradecer o traballo realizado polos vosos compañeiros e compañeiras de 5º e 6º de Primaria que, ao longo destes meses, axudaron na organización e funcionamento da biblioteca do cole durante os períodos de lecer.
Parabéns Vicky, Antía, Elia, Lucía, Nerea, Lúa, Noa, Gabriela, Yaiza, Gabriel e Ángel; sodes todo un exemplo de responsabilidade, compromiso e implicación!!!
Moitas grazas

13/06/19

Mochilas viaxeiras maio-xuño 2019

Velaquí tedes os vosos últimos traballos do curso 2018/19 para as Mochilas Viaxeiras.
Grazas a todo o alumnado e as súas familias pola enorme colaboración  nesta actividade de animación á lectoescritura!!!

08/06/19

Visita da Brigada Helitransportista!!!

O martes 4 de maio, recibimos no colexio a visita dos bombeiros forestais, a brigada que se encarga de coidar os nosos montes contra o lume.
Foi toda unha sorpresa cando chegamos ao patio e vimos o camión dos bombeiros con cinco brigadistas que nos explicaron en que consiste o seu traballo apagando os lumes e a necesidade do coidado do medio ambiente. Curiosidade, o camión de bombeiros custa máis ca un Ferrari!!!
Ensináronnos os medios que utilizaban para apagar os lumes nos nosos bosques. 

Puidemos manexar coas nosas mans as súas ferramentas: mangueira, pas...
Logo, no ximnasio visualizamos vídeos sobre incendios e as súas consecuencias na natureza. 
Rematamos comprometéndonos a axudar a ser apagalumes. Non tirar cabichas, non prender lume no monte, non facer fogueiras...
Unha morea de consellos para coidar a nosa contorna.

Roteiro pola cidade de Pontevedra

O pasado venres, os Pequerrech@s de Infantil foron de "Roteiro pola cidade de Pontevedra". 
O Concello de Pontevedra, a través da Concellaría de Normalización Lingüística, ofrece este roteiro para dinamizar o uso da lingua entre os máis pequenos. 
A actividade busca ligar o uso do noso idioma cos espazos urbanos da cidade e dinamizar os usos orais da lingua galega no ámbito urbano.

Tedes máis información no blogue dos Pequerrech@s da Carballeira:

05/06/19

Que fan os profes da Carballeira polas tardes???

Ao longo deste curso, os mestres e mestras do cole realizamos un Plan de Formación de Profesorado no centro “Introdución á robótica educativa e á programación” e creamos o Grupo de traballo “Robótica Educativa”. Iniciativas formativas no ámbito STEM (ciencia-tecnoloxía-enxeñaría-matemáticas) coas que prepararnos para desenvolver o PDI "Meu amigo o robot 2".

Traballamos a programación con Scratch:

Aprendemos a elaborar e desenvolver proxectos cos diferentes elementos de robótica adquiridos para o PDI (tablets, robots LEGO, Midstorm, Bluebot...) e a manexar as diversas apps:
Tentamos introducir cambios metodolóxicos nas nosas dinámicas de aula coa Gamificación formándonos para complementar a adquisición de  coñecementos dos alumnos e alumnas dunha forma lúdica e motivadora que primase, fundamentalmente, o traballo en equipo:
Unha morea de aprendizaxes que nos axudaron a levar a cado o PDI ao longo destes meses.
Non podemos esquecernos da enorme axuda aportada polo profe Pancho e a súa implicación no desenvolvemento deste Plan de Formación, impartindo persoalmente as sesións de programación e robótica. 
Moitas grazas, Pancho!!!


29/05/19

VI Certame Fotográfico: "Máquinas, antes-despois"

Velaquí tedes a recompilación das achegas participantes no VI Certame Fotográfico coas que engalanamos o corredor principal do colexio. Incribles imaxes que nos amosaron como cambiarion as máquinas co tempo.
Grazas a todos os os participantes. Parabéns, familias!!!

27/05/19

Cóntame un conto!!!

Todos os anos os maiores do cole veñen contar aos Pequerrech@s algún conto durante a Semana das Letras Galegas. 
Durante toda semana Sergio, Gabi, Carmen e Ariadna mergulláronse cos Pequerrech@s no marabilloso mundo da lectura e compartiron historias cheas de imaxinación, aventura, diversión...
Se queredes máis información sobre esta actividade, premede no seguinte enlace ao blog de Infantil:

IX Certame Literario: "Máquinas no futuro"

Velaquí tedes a recompilación dos traballos entregados polos diferentes niveis para o XI Certame Literario:
Educación infantil:


1-2º Educación Primaria:


3º- 4º Educación Primaria:


5º- 6º Educación Primaria:


Parabéns rapaces e rapazas, fantásticas as vosas creacións do futuro!!!

24/05/19

Maio mes das Letras!!!

Ao longo do mes de maio traballamos no colexio o autor homenaxeado o Día das Letras Galegas 2019, Antonio Fraguas Fraguas.
Nas aulas ensalzamos a figura do autor (investigación e documentación, obradoiros de recitación e teatro, traballamos a súa obra...) engalanamos os corredores...

O xoves, organizamos unha xuntanza na que homenaxeamos a figura de Antonio Fraguas. O acto foi presentado polas nosas compañeiras Lucía e Nerea de 5º de Primaria que o fixeron realmente ben. Parabéns rapazas, unha intervención moi ben preparada e traballada!!!
Empezamos cunha presentación biográfica sobre o autor, froito da labor de investigación dos maiores do colexio.
A continuación os nenos e nenas de 6º de Primaria escenificaron a obra de teatro "O casamento da Pulga" recompilado no "Cantigueiro de Cotobade " de Antonio Fraguas. Non podemos esquecernos de agradecerlle a profe Hermitas a súa enorme axuda para poder teatralizar. Tampouco nos esquecemos da profe de Música pois ensinoulles aos rapaces e rapazas a bailar unha muiñeira para a representación.

Logo, entregáronse os diplomas, por niveis, correspondentes aos traballos do IX Certame Literario: "Máquinas no futuro".
Despois, visualizamos un vídeo con todas as achegas das familias ao VI Certame Fotográfico: "Máquinas, antes-despois". Grazas a todos e todas os que colaborástedes nesta actividade!!!
Finalizamos coa entrega de diplomas e un agasallo para os participantes no VI Certame Fotográfico.
Non nos esquecemos as actividade organizada polas compañeiras de 5º de Primaria, unha busca do Tesouro para todo o alumnado do colexio e que levamos a cabo durante o recreo do xoves. Parabéns, rapazas!!!

22/05/19

Saída ao Pazo de Lourizán

O pasado mércores 15 de Maio, todo o alumnado de Primaria foi ao Xardín Botánico de Lourizán.
Fomos recibidos por Alberto, traballador do centro de investigación, que nos explicou un pouco a historia do famoso avogado Montero ríos, propietario desta finca.
Amosounos o palacio por fóra, os xardíns construidos entre finais do século XIX e principios do XX e o centro de investigación.
Despois Alfredo, bombeiro forestal, acompañounos no resto da visita: a mesa de pedra...
As sequoias de grande tamaño...
As grutas...
O invernadoiro...
Foi xenial e disfrutamos moitísimo.