DÍA INTERNACIONAL DA MULLER

 Na nosa biblioteca temos unha escolma de obras para que a rapazada poida aprender dos múltiples referentes de mulleres que temos na nosa historia!

DÍA DE ROSALÍA

 Neste día de Rosalía, a rapazada do noso colexio participou na súa celebración no Pazo Provincial (da Deputación de Pontevedra), onde proxectamos o vídeo do ano pasado, limos poemas de Rosalía de Castro e cantamos "O Moucho" da man de Migallas Teatro. 

Unha marabilla!

                                                                                                                                

Visita da autora: LUCÍA MOJÓN

 O noso alumnado de primeiro ciclo de educación primaria tivo unha visita moi especial! A autora Lucía Mojón, co seu libro "Biscoito de Castañas"! 

Tivemos ocasión de entrevistala e descubrir como crea as historias e aventuras que enchen de maxia os seus libros. Xogamos a imaxinar novas personaxes e mesmo cantamos o retrouso dos seus protagonistas!

Unha sorte poder ter estas visitas no noso cole da Carballeira. Grazas por vir!

                                                                                                                          

PLAN DIRECTOR: Acoso e ciberseguridade

 O alumnado de 4º, 5º e 6º de Primaria, da man do Plan Director, aprendeu sobre:

• Os distintos tipos de acoso (incluído o ciberacoso) e a responsabilidade que temos como comunidade educativa.
• O uso seguro das redes.
• A identificación de perigos e como actuar .
• O que constitúe un delito nas redes. 

DÍA DA MULLER E DA NENA NA CIENCIA!

 Hoxe o alumnado de 4º de Educación Primaria e da man de Faro da Escola, poderon aprender sobre mulleres científicas que traballan no Oceanográfico! Esta videoconferencia con diferentes escolas de Galicia foi unha oportunidade única para resaltar o traballo das mulleres neste ámbito.

Así que xa sabedes, queridas alumnas. Se así o queredes, o mundo científico está agardando por vós!

FAMILIAS NO ENTROIDO DA CARBALLEIRA!

Sorpresa! Grazas á AMPA, no colexio houbo chulas, filloas e orellas e tanto a rapazada de 5º e 6º de Educación Primaria como o alumnado de Infantil contribuíron na súa creación. Que ricas!! E sabendo que as recetas son das súas avoas? AS MANS VALEN OURO!!

AUXULIAR DE CONVERSA: UNHA GRAN OPORTUNIDADE!

 A nosa querida Camila, de Texas, é a auxiliar de conversa deste ano no colexio. Temos a gran sorte de tela con nós e que lle ensine á rapazada diversos aspectos da súa cultura e do seu país, integrando ao alumnado nunha experiencia única! 

Desde os nosos primeiros pasos na radio ata exposicións na aula, o noso alumnado aproveita cada oportunidade para aprender un chisco máis!

DÍA DA PAZ

 Hoxe, 30 de xaneiro, conmmemoramos no colexio o día da Paz. Nestes tempos que corren é imprescindible educar para a paz e aplicala ao longo da nosa vida. 

O alumnado realizou por cursos unha man da paz:

Fixemos un mural "MANS DE PAZ":

Despois desexamos a paz mundial e rematamos cunha canción!

Grazas por participar!

CONCURSO DA RADIO ESCOLAR: O LOGO!

 O noso alumnado de educación primaria estivo devanándose os miolos para poder facer un logo da radio escolar. Durante esta semana fomos desvelando pouco a pouco as e os finalistas...

Que tiveron o seu propio premio por chegaren á última rolda!

E conseguimos o noso novo logo:

Moitísimas grazas a todas e todos por participar e lembrade: por moito que a Intelixencia Artificial (IA) nos poida axudar a pulir certas creacións, o máis importante son as vosas ideas e como as facedes realidade porque... AS MANS VALEN OURO! 

Ponte a zero: reciclaxe en Educación Infantil!

 A xestión dos residuos é un dos máis importantes e complexos retos ambientais a afrontar para todas e todos, pero con esta actividade para os máis cativos e cativas, seguro que foi un chisco máis sinxelo e moito máis divertido!!

LECTURA EN FAMILIA!

 Hoxe foi un día moi especial para o colexio! Convidamos ás familias a participar nesta actividade de animación á lectura co alumnado de infantil e pasámolo en grande! Contos, monicreques... Unha marabilla!

O NADAL CHEGA Á CARBALLEIRA

 Ao alumnado do noso centro encántalle o Nadal e así o demostra con esta canción! A que o fan ben? Se non volo queredes perder en directo, vémonos o día 19!!

                                                                                            

UN TRIMESTRE DE "PONTE A ZERO"!

 Este trimestre tivemos múltiples actividades da man de "Ponte a Zero". Aprendimos un montón, botádelle un ollo ás diferentes actividades que fixemos, non teñen desperdicio!

• Dando nova vida aos residuos
• Xogo da miñoca
• Introdución á horta escolar
• Quen vive aí?
• Aventuras dunha monda de pataca
• Residuos Con-ciencia: limpiadores alternativos
• Residuos Con-ciencia: reciclaxe de aceite para facer xabón

NOVEMBRO: MES DA CIENCIA!

 Novembro é o mes da ciencia e tivemos a sorte de contar con alumnado e familias que quixeron compartir os seus experimentos! 

• Lucas (1º de Educación Primaria)

• Lucía Castro (3º de Educación Primaria)

• Xiana (3º de Educación Primaria)

• Lucía (6º de Educación Primaria) e Manuel (1º de Educación Primaria). Preme AQUÍ para o primeiro vídeo e AQUÍ para o segundo

• Laura (2º de Educación Primaria)

• Xoan (2º de Educación Primaria)

Moitísimas grazas por participar! Foron incríbles!

                                                                        

25 de novembro: DÍA INTERNACIONAL CONTRA A VIOLENCIA DE XÉNERO

 Este 25 de novembro, no CEIP Plurilingüe A Carballeira fixemos unha morea de cousas, grazas ás indicacións de Chiña!

• Un mural colaborativo onde todo ao alumnado loitou contra o virus violentum xenerum terribilis, así como unha milla solidaria!

       

• Lecturas para poder vencer a este virus.

                        

Agardamos que fose do voso interese e que o alumnado o pasase xenial!!! Ata a próxima!

                                                                                

ANIMÁDEVOS A PARTICIPAR!

 Como xa sabemos, o tema do noso Proxecto Documental Integrado (PDI) deste ano é: as mans valen ouro!

Animamos a todas as familias que así o desexen a participar co centro, demostrando como as nosas mans son instrumentos fundamentais para facer cousas alucinantes!

Agardámosvos!