PREMIOS FARO DA ESCOLA

 A nosa escola está de noraboa, xa que obtuvimos varios premios polo noso "Faro da Escola"! Parabéns á rapazada por conseguilo, por moitos máis!

Día do Medio Ambiente - Wangari Maathai

 Nesta conmemoración, grazas á axuda das familias, conseguimos reservar un recuncho do noso patio para dedicarllo neste 5 de xuño, día do Medio Ambiente, á feminista africana Wangari Maathari. Foi Premio Nóbel da Paz e o seu obxectivo foi combatir a deforestación e a desertificación co cinturón verde (plantacións de árbores) en África, mentres loitaba contra a pobreza empoderando ás mulleres rurais. 

A rapazada plantou flores no noso xardín, levaron regalos conmemorativos e leron poesías en honor a Wangari. Un exemplo a seguir!

Ademais, con 6º curso de educación primaria e grazas ás achegas de Camila, aprendimos sobre comida saudable e fixemos un obradoiro con degustación, por suposto!

Estaba riquísimo! Ata a próxima!

Música e familias: diversión asegurada!

 Desta quenda, o alumnado e as familias do noso colexio xuntáronse baixo o amparo da música para poder gozar todas xuntas en comunidade. Pasámolo xenial, vémonos na seguinte! Música, mestra!!

Obradoiro de xogos de mesa!

 A rapazada de 6º de educación primaria estivo desenvolvendo un obradoiro para as súas compañeiras e compañeiros de 1º e 2º de educación primaria. Divertíronse moitísimo!

Recompilación do noso PDI: AS MANS VALEN OURO!

 Durante este curso fixemos moitas achegas ao noso PDI, aí vos van unhas cantas:

• Construimos coas nosas mans e coas das nosas familias... ata unha estación espacial internacional!

• Cociñamos (en familia tamén)

• Fixemos chapas

• Manualidades

• Na horta

• Día das Letras Galegas

Moitas grazas a todas/os por participar! Sen vós non sería posible ter feito tantas cousas!

17 de maio Día das Letras Galegas: Begoña Caamaño

 A rapazada do noso colexio estivo aprendendo sobre Begoña Caamaño a  periodista e escritora feminista que é homenaxeada este 17 de maio coa conmemoración do Día das Letras Galegas.

Os diferentes cursos achegaron diversos recursos (pasapalabras, debuxos, investigacións sobre a autora) que se expuxeron no colexio. Ademais, escoitamos cancións galegas no recreo, despois 6° leunos un manifesto da autora e por último limos libros en galego todos os cursos xuntos no patio!

Os maios

 Os maios chegaron ao noso colexio! Grazas ás achegas da rapazada e as familias contruímos este maio que podedes ver na entrada do colexio. Moitas grazas por participar!

23 DE ABRIL - Día do libro

Aproveitando a celebración do día do libro, a rapazada do noso colexio estivo facéndonos as súas recomendacións lectoras, desde educación infantil ata educación primaria. Non volas perdades!!

ESTAMOS EN RADIO PONTEVEDRA!

 A rapazada de 4º e 6º curso de Educación Primaria do noso cole foi a Radio Pontevedra e gañamos un concurso! O premio foi que durante estes 15 días estarán en antena, retransmitindo este fragmento que gravaron na saída, non volo perdades!

                                                                                                                                            

Coidamos os ollos!

 Hoxe tivemos visita para aprender a coidar os nosos ollos, aprendimos moitas cousas e tivemos concurso ao final para comprobar a nosa aprendizaxe. Isto da miopía tiña moita miga. Foi moi divertido!

Novos recursos na biblioteca

 

Da man de Iria Bermúdez (Mans de Ouro - @mansdeouro), este ano contamos con recursos adaptados para atender á diversidade do noso alumnado, empregando diversos formatos:

• Poesía con Colas de Sereas
• Comprensión lectora con Formando Monstruos
• Bibliografías con Mulleres Influíntes ou Mulleres Marabillosas
• As novas con Formando Noticias

E moitos máis! Son xeniais!

ENGLISH THEATRE!

 Hoxe tivemos a sorte de ter teatro en inglés para a rapazada de Educación Infantil e primeiro e segundo de Educación Primaria! Escachamos coa risa, grazas por vir!

                                                

PARTICIPA NA PDI!

 Como sabedes, estamos co nos proxecto "As mans valen ouro" e convidamos ás familias a que compartan as súas experiencias:

                                    

VISITA CLUB CISNE BALONMÁN

 Este venres aprendimos sobre a alimentación e hábitos saudables da man deste equipo de profesionais, grazas por vir!

                                                                                        

Obradoiro de animación á lectura e familias con: Bolboreta!

 A rapazada de 1º e 2º de educación primaria estiveron aprendendo a importancia de quererse a unha mesma/o e da autoestima grazas a o conto da bolboreta. Estivo xenial!

DÍA INTERNACIONAL DA MULLER

 Na nosa biblioteca temos unha escolma de obras para que a rapazada poida aprender dos múltiples referentes de mulleres que temos na nosa historia!

DÍA DE ROSALÍA

 Neste día de Rosalía, a rapazada do noso colexio participou na súa celebración no Pazo Provincial (da Deputación de Pontevedra), onde proxectamos o vídeo do ano pasado, limos poemas de Rosalía de Castro e cantamos "O Moucho" da man de Migallas Teatro. 

Unha marabilla!

                                                                                                                                

Visita da autora: LUCÍA MOJÓN

 O noso alumnado de primeiro ciclo de educación primaria tivo unha visita moi especial! A autora Lucía Mojón, co seu libro "Biscoito de Castañas"! 

Tivemos ocasión de entrevistala e descubrir como crea as historias e aventuras que enchen de maxia os seus libros. Xogamos a imaxinar novas personaxes e mesmo cantamos o retrouso dos seus protagonistas!

Unha sorte poder ter estas visitas no noso cole da Carballeira. Grazas por vir!