Ano Castelao e Día da Poesía

Cada 21 de marzo celébrase o Día da Poesía. Este ano, ademais, é o ano Castelao, conmemorando o 75º aniversario da súa morte. 

Castelao, foi unha figura polifacética da nosa cultura: escritor, político, pintor, caricaturista,... Se ben é certo que non destacou pola súa poesía, si ten escrito algún poema, como o que decidimos traballar no noso cole para celebrar o Día da Poesía. 

Este poema, titulado "Lela" pertence á súa obra de teatro "Os vellos non deben de namorarse" (Lance primeiro, 2ª escena) e foi musicado por Rosendo Mato Hermida. Existen varias versións cantadas: Dulce Pontes, Carlos Núñez, María do Ceo, Benedetta Ciotti... ata foi cantada por unha das concursantes dun programa similar a "La Voz" da televisión serbia. Todas elas podedes topalas en Youtube.

Nós conmemoramos este día da poesía cunha versión rockeira do grupo Astarot, neste caso acompañado pola voz da cantante galega Lucía Pérez.

 

Encontro con Irene Alonso do alumnado de 2º e 3º de EP

O 26 de febreiro visitounos a escritora Irene Alonso grazas á nosa participación no proxecto Faro da Escola.

Irene é a autora de libros como As cicatrices do caranguexo (2021), un conto autobiográfico que aborda o cancro con tenrura e positivismo; A caca cuca (2021) e A caca cuca viaxa a U.K. (2023); O rap do coello fedello (2024) ou Refugallo o espantallo (Edicións Xerais, 2024), con ilustracións de Ignacio Hernández, que foi o libro que nos veu presentar e que xa leran os nenos e nenas de 2º e 3º. 

 

O xogo da Miñoca

 Non todo foi entroido a semana pasada!! Tamén continuamos traballando no noso PDI

Seguindo coas actividades de sostibilidade, volvemos contar coa colaboración da iniciativa Ponte a Zero da Deputación de Pontevedra. Esta vez tocoulle ao alumnado de primeiro descubrir un montón de cousas sobre a reciclaxe, a sostibilidade, o coidado do medio ambiente... coa axuda de Cristina e do "Xogo da miñoca"

 

Día de Rosalía: Xan

En 1880 Rosalía de Castro publicou o seu último libro de poemas en galego, Follas Novas.  

Entre os poemas do libro figuraba “Xan”. As primeiras estrofas do poema din así:

Xan vai coller leña ó monte,

Xan vai a compoñer cestos,

Xan vai a poda-las viñas,

Xan vai a apaña-lo esterco,

e leva o fol ó muíño,

e trae o estrume ó cortello,

e vai á fonte por auga,

e vai a misa cos nenos,

e fai o leito i o caldo...

Xan, en fin, é un Xan completo,

deses que a cada muller

lle conviña un polo menos.

Pero cando un busca un Xan,

case sempre atopa un Pedro.

 

O alumnado de todos os cursos do cole, recreou estas estrofas de distinto xeito: con debuxos, con composicións de escenas,...  

Con todas as recreacións elaboramos o seguinte vídeo que ten como base musical a canción Xan de Uxia, do álbum  Rosalía Pequeniña (℗ 2013 Editorial Galaxia S.A.) 

 
E aí vai o resultado:

 

 

 

 

Ponte a Zero: Fabricación de xabón con aceite usado

O 7 de febreiro o alumnado de 6º participou nunha demostración de fabricación de xabón a partir de aceite de cociña usado. 

Manolo explicounos un montón de cousas antes de facer a demostración: 

Repasamos a necesidade de ter en conta as 3R no orde adecuado: Reduce, Reutiliza, Recicla.

Aprendemos que temos que procurar mercar produtos de limpeza o máis sostibles e menos contaminantes posible, ou, o que é mellor, fabricar os nosos propios produtos de limpeza con ingredientes sinxelos e presentes en todos os fogares (limón, bicarbonato, sal, vinagre,...)

E rematamos aprendendo a fabricar xabón a partires do aceite usado de cociña.

Todo acompañado do inigualable sentido do humor de Manolo, que fixo que, ademais de aprender un montón de cousas, pasaramos unha xornada moi divertida.

Se vos animades a probar, preguntádelle ao alumnado de sexto. Poden darvos a receita

 

Visita aos museos científicos de A Coruña

O día 4 de febreiro o alumnado de 4º, 5º e 6º fixo unha visita aos Museos científicos de A Coruña. 

Ademais dun marabilloso día de convivencia, puideron aprender un montón de cousas sobre o ser humano e sobre a vida nos océanos

 

Día da ilustración con Marc Taeger

 

En primeiro lugar, dar as grazas a todas as familias que asistiron ao obradoiro de ilustración. 

Como cambiou Carapuchiña Vermella grazas á imaxinación dos nenos e nenas do cole!!!

Apareceron dende Carapuchiñas alieníxenas ata con forma de insectos. Polos traballos feitos, estamos seguros de que temos no cole aos ilustradores/as de contos das próximas décadas. 

Deixámosvos unha pequena escolma en imaxes deste obradoiro

“Pekerecicla”

 O 24 de xaneiro tivemos a honra de recibir a visita do programa “Ponte a Zero”, creado co fin de educar e sensibilizar sobre a redución e a boa xestión dos residuos municipais, levado a cabo pola Deputación de Pontevedra. 

Nesta ocasión os asistentes foron os cativos e cativas do colexio, os nenos e nenas de Educación Infantil. Tiveron a sorte de participar na actividade “Pekerecicla” encamiñada a que os pequenos e pequenas coñezan a importancia de coidar o noso planeta e as consecuencias e danos que facemos coa xeración e mala xestión de residuos. 

A través de diversas mascotas, dunha maneira moi dinámica e lúdica, chegaron aos máis peques facéndolles partícipes da catástrofe ambiental que está a ocorrer actualmente, recalcando a importancia na reciclaxe adecuada dos diversos residuos e salientando a importancia das tres R: REDUCE, REUTILIZA E RECICLA!

 

Lectura e familias:Obradoiro de ilustración con Marc Taeger

 

Continuamos coas actividades de lectura e familias. 

Para celebrar que o 30 de xaneiro é o Día da Ilustración, organizamos a véspera (29 de xaneiro) un obradoiro cun dos ilustradores máis nomeados:

Marc Taeger

Nado en Suíza, ilustrador, pintor, deseñador e escultor, galardoado, entre outros, co Premio Daniel Gil de Deseño Editorial 2005 polo seu traballo de ilustración en "A  verdadeira historia de Carapuchiña"  ou con dous premios LAUS que concede a ADG (Asociación de Deseñadores Gráficos de España). 

Con el exploraremos o mundo da ilustración a través dos contos e usando a nosa imaxinación porque...

Como ilustrariamos, por exemplo, o conto de Carapuchiña Vermella se fose extraterrestre ou vivira no fondo do mar? 

Invitámosvos a pescudalo coa axuda de Marc o mércores 29 de xaneiro, ás 17:30, na biblioteca do Checho.

NON ESQUEZADES TRAER AS VOSAS CERAS, 

ROTULADORES, LAPIS DE CORES,...!!!

Nadal Vexetal

Deixámosvos un pequeno resumo de toooooodo o traballo feito o pasado martes. Aproveitamos para pedir desculpas a todas as familias que nos fixeron un encargo que non fomos capaces de cumprir, pero se vedes o vídeo, comprobaredes que fixemos todo o posible por logralo. 

Sentímolo moito e agradecemos moitísimo a vosa comprensión e apoio.

 

Novembro: Mes da ciencia en galego

Como sabedes este curso estamos a traballar cos ODS e decidimos que o "Mes da ciencia en galego" tivese relación con este traballo. Amosámosvos a continuación algúns dos traballos científicos do noso alumnado. Non están todos, pero esperamos que os que están vos gusten tanto coma a nós.

Traballo do alumnado de 4º de EI

 En 5º de EI, ata nos fixeron un vídeo do traballo relacionado co ODS nº 13:

Os nenos e nenas de primeiro traballaron cos ecosistemas 

 

En 3º , no que están traballando o ODS 2, experimentaron coa conservación dos alimentos

 

En 6º traballaron no uso de enerxías limpas como a solar; e pola cara que ten algún parece que foi moi saborosa a experiencia

Día contra a violencia de xénero

Presentámosvos algúns dos traballos que fixemos para sumarnos ao rexeitamento da violencia de xénero. O noso desexo é que, grazas a estes traballos, algún día todos os nosos alumnos e alumnas, cada 25 de novembro, celebren o día en que se deixou de exercer violencia contra as mulleres.

Este ano traballamos a través de distintos contos. Presentámosvos algúns dos resultados destes traballos

 

ASEMBLEA A CEO ABERTO

 

Hai unha semana pedimos axuda ás familias para transformar a  zona verde do noso patio.
Queriamos aproveitar a caída das árbores, a causa do temporal,  para crear unha asemblea a ceo aberto. A resposta foi fabulosa.
O sábado pola mañá chegaron ao colexio familias preparadas con luvas, sachos, laias, motoserras... moitas  ganas de botar unha man e un entusiasmo que compartimos con elas e que fixo que pasaramos unha mañá de sábado de moito traballo, pero tamén de moitísima alegría e benestar.

 

 

Xa temos a nosa asemblea a ceo aberto ! 

Un espazo máis onde aprender dun xeito significativo, achegado á vida diaria e motivador,  onde estimular a creatividade,  a concentración, a  linguaxe, a capacidade de cooperación e comunicación, reducir o estrés... APRENDER A RESPECTAR E AMAR A NATUREZA  e moito mais!

Moitísimas grazas de novo familias!

 

Samaín na Carballeira

Deixámosvos un pequeno vídeo resumo da celebración do Samaín no cole. Tivemos unha semana intensa de traballo, pero tamén moita diversión: ODScabazas, monstros, pantasmas, meigas... contos de medo, rap, cadáver exquisito...

e, por suposto, castañas e "chouripans" elaborados coas vosas achegas e coa axuda de varias familias. A todos/as agradecémosvos o voso traballo e colaboración coas cabazas, castañas, leña,... e o voso traballo. Sen vós non tería sido posible facelo tan ben. 

 

 

24 de outubro: Día das bibliotecas

Que mellor maneira de conmemorar o día das bibliotecas que facendo unha sesión de contacontos para todas as familias?

O 23 de outubro estiveron con nós Olalla González e Marc Taeger, e tivemos a biblioteca chea de público de todas as idades. Grazas, familias, por acompañarnos e pasalo ben con Marc e Olalla.

 

E o 24 o alumnado recolleu na biblioteca a mochila viaxeira, que xa está a funcionar.

Mirade que contentos/as están todos/as

Cabazas e ODS

 

Arrancamos co PDI deste curso!!!!

 

Este curso cada grupo traballará algún dos ODS (Obxectivos de desenvolvemento sostible). 

E en que consiste unha ODSCABAZA? 

Pois fácil, nunha cabaza relacionada co ODS que se traballa en cada grupo. 

Aínda que soe difícil, todos os anos pensamos que non ides ser capaces e todos os anos nos sorprendedes coa vosa imaxinación, creatividade e traballo. Sabemos que este ano tamén o faredes. 

Confiamos plenamente en que seredes quen de facer unha magnífica cabaza relacionada co ODS do voso curso, así que vos deixamos unha táboa con todos eles

Grupo	ODS	Como pode ser a miña cabaza?
4º EI e 6º EI	Nº 2: Auga e saneamento	Decoración relacionada coa auga e os seus usos: beber, aseo, cociña; co rego; coa rede de sumidoiros,...
5º EI	Nº 13: Acción polo clima	Decoración relacionada co cambio climático, coa subida das temperaturas, coa redución de gases de efecto invernadoiro,...
1º e 2º EP	Nº 15:Vida de ecosistemas terrestres	Decoración relacionada coa protección dos bosques, coa loita contra a desertificación, coa protección de plantas e animais terrestres,...
3º EP	Nº 2: Fame cero	Decoración relacionada coa agricultura sostible, a boa nutrición,...
4º EP	Nº 14: Vida submarina	Decoración relacionada cos océanos, a pesca sostible, a reutilización de redes,...
5º EP	Nº 3: Saúde e benestar	Decoración relacionada coa saúde, vacinas, enfermidades,...
6º EP	Nº 8 e 9: Traballo decente e industria e innovación	Decoración relacionada coa industria non contaminante, co traballo digno, decorada innovando cos materiais,...

Esperamos con ansia as vosas creacións!!!

COMEZAMOS !!!

 Ola a todos/as!

Botabades de menos as novas do cole? Xa sabemos que tardamos un pouco en comezar, pero para compensar, comezamos con moitas noticias:

Achégase o día das bibliotecas e para celebralo organizamos a véspera, un obradoiro para as  familias con dous magníficos creadores de contos: MARC TAEGER E OLALLA GONZÁLEZ

Poderiamos contarvos un montón de cousas sobre o seu traballo, pero non nos caberían nesta entrada, así que será mellor que veñades a coñecelos. Estamos convencidos/as de que o pasaredes moi ben.
 

Celebrarase o 23 de outubro ás 17.30, na nosa biblioteca e leva por título "CONTAPINTACONTOS". 

So hai dúas condicións para asistir:

Que os/as nenos/as veñan acompañados/as por un adulto/a e gañas de pasar un bo rato con dous autores/as de historias, que contan con moitísima experiencia. Seguro que coñecedes algunhas das súas obras, como "Chibos, chibóns", "Garabanciño", "Aquiles, o puntiño", "Artur" ou "A verdadeira historia de Carapuchiña vermella". 

Animádevos a pasalo en grande cos contos!!!

 

Tamén se achega o Samaín e o cole comeza a estar terrorífico. Xa temos pantasmas, monstros, arañas... 

e entre todos/as estamos creando un conto utilizando a técnica do cadáver exquisito, que esperamos ter listo para o día 30. 

Ese día celebraremos o Samaín e o Magosto (Samagosto) se o tempo nolo permite, con disfraces, lectura de contos terroríficos (ou serán graciosísimos?), castañas, choripáns, a proxección do cadáver exquisito, música,...

Tamén teremos a exposición de cabazas (da que xa vos daremos máis información a semana que vén) pero que seguro estará relacionada cuns carteis que apareceron na entrada do cole sobre os ODS.

Queredes saber que son os ODS? Clicade na imaxe

 Seguiremos contándovos cousas moi pronto!!!

 

 

 

 

No verán: Un bo momento para cociñar as receitas do obradoiro de cociña

Como sabedes, fai unhas semanas fixemos un obradoiro de cociña usando so vexetais. 

Cada curso cociñou distintos pratos, por iso, parécenos unha boa idea compartir con vós todo o receitario, para que poidades, ou ben reproducir os pratos que fixeron os/as vosos/as fillos/as, ou ben cociñar outros novos. 

Se o facedes, lembrade facelo con eles/as, xa que pola experiencia dese día, podemos dicirvos que son uns/nhas grandes chefs. ANIMÁDEMOS!!!

FELIZ VERÁN A TODOS/AS!!!

Receitas Ceip A Carballeira

Publish at Calameo

CINEMA CLUB

 O alumnado de 3º e 4º de Primaria estivo traballando nun proxecto ao longo do curso dende a área de plástica e educación audiovisual. 

Convertéronse en directores/as, cámaras, actores e actrices e deseñaron a súa propia película. 

Primeiro aprendimos un pouco de teoría e historia do cine e despois, puxémonos mans á obra deseñando o  noso story board, elaborando os materiais, ensaiando... ensaiando moito! 

Finalmente deseñamos os nosos carteis para a difusión das nosas películas e practicamos a presentación das mesmas.

Hoxe a Carballeira encheuse de Cine!!! Puidemos visionar todas as súas creacións e facer unha charla-coloquio sobre as memas.

Moitas grazas pola vosa arte!!!!!

3º premio da categoría "Recolectores de mostras" do Proxecto Mosquito Alert

Onte celebrouse o evento final do proxecto Mosquito Alert, no que participou o alumnado de 5º e 6º, na sede central do CSIC en Madrid. 

Alégranos moito comunicarvos que acadamos o 3º premio co seu traballo de divulgación sobre os mosquitos. 

Nós non puidemos asistir ao evento, pero deixámosvos a imaxe do momento no que se anunciaba o noso premio

Lembrámosvos as entradas do blog nas que vos contabamos cousas sobre este proxecto

http://dinamizacioncarballeira.blogspot.com/2024/05/proxecto-de-ciencia-cidada-mosquito.html

http://dinamizacioncarballeira.blogspot.com/2024/06/somos-un-dos-5-centros-nominados-ao.html

A PRIMAVERA TEN QUE SER NOSA: PROXECTA +

 Dende a Carballeira, para favorecer a vida activa e saudable levamos a cabo unha serie de actividades para incrementar a actividade física diaria que realiza o alumnado. Neste senso, a música e a danza foron os vehículos principais. 

Aquí tendes unha mostra ao ritmo do Sonoro Maxín e a súa canción A primavera ten que ser nosa.

O alumnado de 3º e 4º de Primaria deseñaron e confeccionaron as flores coas que todo o cole bailou. Noraboa polo traballo!

Somos un dos 5 centros nominados ao premio final de Mosquito Alert

Como sabedes, o alumnado de 5º e 6º participou este curso no proxecto de ciencia cidadá "Mosquito Alert", dentro da categoría de Recolectores de mostras. 

Este proxecto, que se deselvolve en todo o país, porá o seu punto e final cun acto en Madrid, o próximo venres día 14, na sede central do CSIC (Consello Superior de Investigacións Científicas) no que se recoñecerán os mellores traballos de entre todos os participantes. Nós non poderemos asistir a este acto, pero...

...o sábado déronnos unha sorpresa. 

Recibimos a seguinte mensaxe dos responsables de Mosquito Alert:

 

Parabéns ao alumnado de 5º e 6º 

polo seu gran traballo!!! 

 

Deixámosvos o vídeo de presentación dos nosos produtos que se proxectará en Madrid

 

 

CPInnova: Obradoiro de cociña e Megareto superado!!!!

Ao longo do pasado luns e martes gozamos no centro da II Edición do Obradoiro "Coñecer e cociñar o que vén da terra" no que, seguindo co que aprendemos o ano pasado sobre as hortalizas, froitas, cereais, legumes, froitos secos e froitas secas, elaboramos unha serie de receitas empregando produtos de tempada, saudables e de compra local, e tratando de evitar todos os residuos posibles! Ademais, puxemos en común a información recollida por todos os cursos sobre compra local e de residuo 0 en Marín, Pontevedra e arredores!

Puidemos poñer en práctica as nosas dotes pelando, cortando, pesando, amasando... e entre outras receitas, o alumnado preparou distintas galletas (empregando cereais variados e incluso legumes!), xeados de froitas, panciños para hamburguesa, tortitas de avea e plátano, madalenas de cenoria, roliños de verán, polos de sandía...e ata sushi de verduras e froitas!

Todo isto tomando boa conta das receitas, para poder repetir as nosas favoritas na casa! Animádesvos? 

 

 

MEGA RETO RR0  CONSEGUIDO!!!!!

Hoxe, día dos océanos, celebramos con entusiasmo o noso logro.
Nunha semana non xeramos no cole ningún residuo:  0 plásticos e 0 papeis !!!
Estamos orgullos@s de coidar o medioambiente e os nosos océanos. Non queremos ver tartarugas enredadas en plásticos nin microplásticos na area das nosas praias.
Lembrade escoller produtos sen plásticos e reutilizar as bolsas.
Moitas grazas a toda a comunidade educativa e en especial ás familias que xa non mandan plásticos nin papeis nas merendas.

E xa sabedes, o día 20....MEGA RECREO!!!! 

ÁNIMO CARBALLEIRA! Imos polo bo camiño.

 

VINCULADOS CON AUSTRALIA

 Dentro do noso proxecto de centro VINCULADOS, dende seccións bilingües e lingua estranxeira, levamos a cabo un proxecto de intercambio con alumnado de moi lonxe, pero moi moi lonxe. Nin máis nin menos, o alumnado de 5º e 6º de primaria estableceron contacto cun centro de Australia!!!!!!

Aínda que a diferencia horaria non xogaba ao noso favor, establecimos contacto con eles e elas. Presentámonos e ensinámoslle onde vivíamos, que comíamos, como festexábamos... Para que nos coñecesen un pouquiño mellor.

Con isto, presentamos o seguinte vídeo onde expoñemos gran parte do noso traballo! Falando en inglés, castelán e galego! Que non se diga que non coñecemos e utilizamos diferentes linguas!

Estamos moi emocionados esperando a súa resposta!

PROXECTO DE CIENCIA CIDADÁ: Mosquito Alert

 O alumnado de 5º e 6º de Educación Primaria participou este curso nun proxecto de ciencia cidadá. A investigación trata de estudar os mosquitos e a proliferación do mosquito tigre no territorio español. O proxecto está dirixido por un grupo de científicos cataláns que precisa da nosa axuda para a recolección de mostras. Así, tanto 5º como 6º puxéronse mans á obra estudando os diferentes tipos de mosquitos, as súas fases de crecemento, lugares de cría...

 Tamén tivemos conexión directa cos científicos do proxecto a través dunha videoconferencia para resolver as nosas dúbidas. Despois de todas estas tarefas de investigación saímos á "caza" de mosquitos e dos posibles lugares de cría que pode haber na nosa contorna. Coa axuda das familias que nos guiaron por Lourizán, analizamos os regatos, augas estancas, imbornais e lavadoiros. Podemos dicir que atopamos algunhas mostras e de volta no cole as analizamos e conservamos en alcohol para enviar aos científicos. 

Esperamos que o noso traballo fora de gran axuda para a súa investigación !!!

Black and White Doodle Hello Summer Vibes Photo Collage de sorayagonzalez414

 Ademais, como aprendemos moitas cousas sobre os mosquitos o alumnado elaborou un folleto informativo que inclúe consellos para evitar que críen nas nosas casas e unha infografía na que se compara o mosquito común co mosquito tigre

 E aquí tedes a todos/as repartindo o folleto entre as familias